နာနတ်သီး အာနိသင်

 

-

နာနတ်သီးကိုစားလျှင် ယင်းတွင်ပါဝင်သော ဘရိုမယ်လိန်းကြောင့် အရောင်ကျစေသည့် အာနိသင်ကို ရရှိစေပါသည်။ ခန္ဓာကိုယ်၏ နေရာအနှံ့မှ ရောင်ရမ်းမှုမှန်သမျှကို လျော့နည်းစေသည်။ ဥပမာ အရိုးများရောင်ခြင်း၊ ကြွက်သားများရောင်ခြင်း၊ ကြွက်သားများတောင့်တင်းခြင်း (Muscle spasms)၊ သွားနှုတ်ခြင်း အပါအဝင် ခွဲစိတ်ကုသမှု အမျိုးမျိုးကြောင့် ရောင်ခြင်းအပြင် နာကျင်မှုဝေဒနာများကို သက်သာစေသည်။

 

 အကိုက်အခဲပျောက်ဆေး၊ အရောင်ကျဆေးများ သောက်လျှင် ဖြစ်ပေါ်လေ့ရှိသည့် အစာအိမ်ထိခိုက်ခြင်း၊ ကျောက်ကပ် ထိခိုက်ပျက်စီးခြင်းမျိုးလည်း မတွေ့ရှိရပေ။ နာနတ်သီးစားလျှင် အရေပြား အညိုအမည်းစွဲခြင်းကို ပိုမိုလျင်မြန်စွာ သက်သာပျောက်ကင်းစေပါသည်။ 

 

ဥပမာ အားကစားသမားများ (ဘောလုံး၊ လက်ဝှေ့) တွင် မကြာခဏ ထိခိုက်ဒဏ်ရာကြောင့် အညိုအမည်းစွဲ (Bruise) ရာတွင် နာနတ်သီးမစားသည့်သူများထက် စားသုံးသည့်သူများက ပိုမိုလျင်မြန်စွာ သက်သာပျောက်ကင်းကြောင်း သုတေသနစာတမ်းများက ဆိုပါသည်။ 

 

ဘရိုမယ်လိန်း သာမက အခြားပါဝင်သော အာဟာရဓာတ်ပစ္စည်းများ (ဥပမာ ဗီတာမင် စီ) တွင်လည်း အနာကျက်မြန်စေသော အာနိသင်ရှိသောကြောင့် ဖြစ်ပါသည်။ ထို့အပြင် အမျိုးသမီးများ လစဉ်ဓမ္မတာလာစဉ် ကိုက်ခဲသည့်ဝေဒနာ (Dysmenorrhea) ကိုလည်း သက်သာစေသည်။

 

နာနတ်သီးတွင် ပါဝင်သော ဘရိုမယ်လိန်းသည် သွေးကြောထဲတွင် သွေးမခဲစေရန်နှင့် သွေးကျဲနေစေရန် ဆောင်ရွက်ပေးပါသည်။ သွေးထဲတွင် ပလိတ်လက် (Platelet) ဟုခေါ်သော သွေးမွှားလေးများရှိပြီး ယင်းတို့မှာ စေးကပ်သည့်သဘော ရှိပါသည်။ ယင်းတို့အချင်းချင်းကပ်ပြီး သွေးခဲသွားလျှင် သွေးကြောများပိတ်၍ ခန္ဓာကိုယ်တစ်သျှူးများသို့ သွေးမရောက်ခြင်း ဖြစ်တတ်သည်။ 

 

ဥပမာ နှလုံးကိုသွားသော သွေးကြောလေးများပိတ်လျှင် နှလုံးချက်ချင်းရပ်၍ (Heart attack) သေဆုံးနိုင်ပြီး ဦးနှောက်သို့သွားသော သွေးကြောလေးများပိတ်လျှင် လေဖြတ်ခြင်း (Stroke) ဖြစ်တတ်ပါသည်။

 

နိုင်ငံတကာ သုတေသနစာတမ်းများအရ ဘရိုမယ်လိန်းသည် ပလိတ်လက်များစုပြီး ခဲမသွားစေရန် ဟန့်တားနိုင်စွမ်းရှိသည့် ဓာတ်ပစ္စည်း (Potent inhibitor of platelet aggregation) ဖြစ်ကြောင်း လေ့လာရသည်။ 

 

ထို့ကြောင့် နာနတ်သီးသည် နှလုံးသွေးကြောကျဉ်းရောဂါရှိသူများ၊ ရင်ဘတ်မကြာခဏအောင့်သူများ၊ သွေးတိုးရောဂါရှိသူများ၊ ခြေထောက်ရှိ သွေးကြောများ သွေးသိပ်မလျှောက်၍ နာကျင်ခြင်း၊ ကြွက်တက်ခြင်း၊ ခြေထောက်များဖောခြင်း၊ သွေးကြောများဖောင်းနေခြင်း၊ သွေးကြောများ ရောင်ရမ်း ပိတ်ဆို့ခြင်း (Thrombophlebitis) တို့အတွက် အထူးသင့်တော်သောကြောင့် စားသုံး သင့်သော သစ်သီးတစ်ခု ဖြစ်သည်။

ဒေါက်တာခင်မောင်လွင် (FAME)